പഴംപൊരിക്കവിതകൾ

പഴംപൊരിക്കവിതകൾ

1

വാക്കുകൾ മുറിയട്ടെ, പീതസ്വപ്നങ്ങളിൽ;

രുചിയുടെ ലഹരിയിൽ മൗനം വിടരട്ടെ;

ഒരു പഴമ്പൊരിയിലൊളിച്ചിരിക്കുന്നുവോ,

പ്രപഞ്ചമേ നിന്നുടെ മുഴുവൻ മധുരവും!

2

സായന്തനത്തിലെ നനുത്ത സ്വപ്നങ്ങളിൽ,

രുചിക്കൂട്ടു തീർക്കും സുവർണ്ണഗാത്രി!

മഞ്ഞപ്പട്ടുടുത്തൊരു മധുരപ്രലോഭനം,

ചുടുചായയ്ക്കരികിലണഞ്ഞുവെന്നോ;

3

പുറമേ പീതാഭമാമൊരു പൊൻചട്ടയണിഞ്ഞ്,

അകമേയലിഞ്ഞുചേരുന്ന മധുരമായ്...

മാവിൽ മുങ്ങിയൊരു കവിതപോൽ,

എൻ കൈയിലിരിക്കുന്നൊരു ചൂടു പഴംപൊരി;

​ചൂടുള്ള ചായയും ചില്ലുഗ്ലാസ്സുമീ

മനസ്സിലെത്തിക്കുന്നൊരു പഴയ പാഠപുസ്തകം!

കേവലമിതൊരു വിഭവമല്ലെൻ സഖേ,

തിളച്ചെണ്ണയിൽ വീണുകരിഞ്ഞൊരെൻ

ബാല്യകാലസ്മരണകൾ!

4

തിളച്ചയെണ്ണയിലഗ്നിശുദ്ധി തെളിയിച്ചതിനപ്പുറം,

മഞ്ഞനിറമാർന്ന മാവിൻപുതപ്പിനുള്ളിലായ്,

മൗനം ഭജിച്ചിരിക്കുന്നൂ മധുരനേന്ത്രപ്പഴമിതാ!

✍🏻 ജോസ് ആറുകാട്ടി