2015, മാർച്ച് 4, ബുധനാഴ്‌ച

വെല്‍ഡണ്‍ മൈ ഗേള്‍

മൈ ഗോഡ്! ഇതു വളരെ ഞെട്ടിക്കുന്ന രേഖകളാണല്ലോ. ഇരുമുന്നണികളിലെയും ഈ ഉന്നത നേതാക്കളും പ്രമുഖരായ ചലച്ചിത്ര പ്രവര്‍ത്തകരുമെല്ലാം ഒരന്താരാഷ്‌ട്ര മയക്കുമരുന്നു റാക്കറ്റിന്റെ കണ്ണികളാണെന്നു ചിന്തിക്കാന്‍ പോലുമാകുന്നില്ല. പക്ഷേ ഈ തെളിവുകള്‍ ....
എത്ര ഉന്നതരായാലും ഈ കുറ്റവാളികള്‍ ഒരാള്‍ പോലും രക്ഷപ്പെടാന്‍ അനുവദിച്ചു കൂടാ. വെല്‍ഡണ്‍ മൈ ഗേള്‍ ... നിനക്കെന്റെ എല്ലാ പിന്തുണകളും സഹായവുമുണ്ടാകും.


തന്റെ മേലുദ്യോഗസ്ഥന്റെ വാക്കുകള്‍ എ.സി.പി. പദ്മപ്രിയയെ പുളകമണിയിച്ചു. രാപകലുകള്‍ ഉറക്കമിളച്ചും ജീവന്‍ പണയം വച്ചും നടത്തിയ അന്വേഷണങ്ങളുടെ ഫലമാണിതു്. അഭിമാനത്തോടെ സല്യട്ടു ചെയ്തുകൊണ്ടു പദ്മപ്രിയ മുറിയില്‍ നിന്നു പുറത്തിറങ്ങി.

പിറ്റേന്നു പുലര്‍ച്ചെ മൊബൈല്‍ ഫോണിന്റെ മണിയൊച്ചയാണുപത്മപ്രിയയെ ഉണര്‍ത്തിയതു്. കമ്മീഷണറാണു ഫോണില്‍...  കേന്ദ്ര ആഭ്യന്തര സെക്രട്ടറിയുടെ ഒരടിയന്തിര സന്ദേശമുണ്ടു്. പെട്ടന്നു തന്നെ ഓഫീസിലെത്തണം.  

അന്താരാഷ്‌ട്ര മയക്കുമരുന്നു മാഫിയ ഉള്‍പ്പെട്ട കേസായതിനാലാകാം കേന്ദ്ര ആഭ്യന്തര സെക്രട്ടറി ഇടപെട്ടതു്. 

സമയം ആറരയാകുന്നതേയുള്ളൂ.

കമ്മീഷണറുടെ മുന്നില്‍ പദ്മപ്രിയ സല്യൂട്ടു ചെയ്തു.

നാഗാലാണ്ടിലെ കലാപകാരികളെ അമര്‍ച്ച ചെയ്യുന്നതിനുള്ള പ്രത്യേക കേന്ദ്രസേനയെ നയിക്കുന്നതിനു മികച്ചൊരു ഐ.പി.എസ് ഓഫീസറെ ആവശ്യമുണ്ടു്. കേരള കേഡറില്‍ നിന്നു പദ്മപ്രിയയെ തന്നെ ഡെപ്യൂട്ടെഷനില്‍ വേണമെന്നാണു കേന്ദ്ര ആഭ്യന്തര സെക്രട്ടറിയുടെ മെയില്‍ . ഇപ്പോള്‍ തന്നെ ഇവിടെ നിന്നു റിലീവ് ചെയ്തോളൂ. പേപ്പറുകള്‍ എല്ലാം റെഡിയാണു്.

സര്‍ അതു് ...

ഇവിടുത്തെ കാര്യങ്ങളെക്കുറിച്ചു് ആവലാതി വേണ്ട. ഫയലുകളെല്ലാം എന്റെ പക്കലുണ്ടു്.  കേന്ദ്രത്തിലേക്കു ഡെപ്യൂട്ടെഷനില്‍ പോകാന്‍ ആഗ്രഹിക്കുന്ന നിരവധി പേരാണുള്ളതെന്നു പദ്മയ്ക്കറിയാമല്ലോ. ഇതൊരു ഭാഗ്യമായി കരുതിയാല്‍ മതി. ഉച്ചയ്ക്കു 4:30നു കൊച്ചിയില്‍ നിന്നു പുറപ്പെടുന്ന എയര്‍ ഇന്ത്യയില്‍ മുംബൈ - കല്‍ക്കട്ട വഴി ദിമാപ്പുരിലേക്ക് ടിക്കറ്റു റെഡിയാണു്. നാളെത്തന്നെ ജോയിന്‍ ചെയ്യണം.

പിന്തിരിഞ്ഞു നടക്കും മുമ്പു സല്യൂട്ടു ചെയ്യാനുയര്‍ത്തിയ എ.സി.പിയുടെ കൈ പാതിവഴിയിലെ എത്തിയുള്ളൂ. കമ്പ്യുട്ടര്‍ സ്ക്രീനിലേക്കു മുഖം പൂഴ്ത്തിയിരുന്നതിനാല്‍ കമ്മീഷണര്‍ അതു കണ്ടതുമില്ല.

4 അഭിപ്രായങ്ങൾ: